ನಮ್ಮ ಕಿಚ್ಚ ಸುದೀಪ್ ಹಿಂದಿ ಚಿತ್ರದಲ್ಲಿ

ಬೆಂಗಳೂರು ಆಗಸ್ಟ್ ೨೪: ಎಲ್ಲರೂ "ಫೂಂಕ್" ಎಂಬ ಹಿಂದಿ ಚಿತ್ರದ ಬಿಡುಗಡೆಗೆ ತುದಿಗಾಲಲ್ಲಿ ನಿಂತಿದ್ದು, ಈಗ ಅದರ ಬಿಡುಗಡೆಯಾಗಿ ಎಲ್ಲರ ಮನಗೆದ್ದಿರುವುದು ನಮಗೆಲ್ಲ ಖುಷಿ ಕೊಡುವ ಸಂಗತಿ. ಅರೆ! ಹಿಂದಿ ಚಿತ್ರ ಬಿಡುಗಡೆಯಾದರೆ ಕನ್ನಡಿಗರೇಕೆ ಸಂಭ್ರಮಿಸಬೇಕು?..ಅದಕ್ಕೂ ಕಾರಣ ಇದೆ, ಈ ಚಿತ್ರದ ನಾಯಕ ನಮ್ಮೆಲ್ಲರ ಮೆಚ್ಚಿನ ಕನ್ನಡಿಗ "ಕಿಚ್ಚ" ಸುದೀಪ್. ಸುದೀಪ್ ಈಗ ತನ್ನ ಛಾಪನ್ನು ಹಿಂದಿ ಚಿತ್ರದಲ್ಲಿ ಮೂಡಿಸಿರುವುದು ಎಲ್ಲ ಕನ್ನಡಿಗರಿಗೂ ಖುಷಿ ಪಡುವ ವಿಚಾರ.

ಆದರೆ ಅದರಲ್ಲೂ ಈ ಚಿತ್ರದ ಪ್ರಚಾರಕ್ಕಾಗಿ ವಿಚಿತ್ರ ತರಹದ ಒಂದು ಬಾಜಿ ಶುರುವಾಗಿರುವುದು ಸ್ವಲ್ಪ ಅತಿರೇಕವೆನ್ನಿಸುತ್ತದೆ. ಈ ಚಿತ್ರವನ್ನು ಒಂಟಿಯಾಗಿ ಚಿತ್ರಮಂದಿರದಲ್ಲಿ ನೋಡಿದರೆ ೫ ಲಕ್ಷ ರೂಪಾಯಿಗಳ ಬಹುಮಾನವನ್ನು ಕೊಡುವುದಾಗಿ ನಿರ್ಮಾಪಕ ರಾಮ್‌ಗೋಪಾಲ್ ವರ್ಮಾ ಘೋಷಿಸಿರುವುದು ಕೆಲ ಪಡ್ಡೆ ಹುಡುಗರಿಗೆ ಒಂದು ಸವಾಲಾಗಿದೆ. ಆದರೆ ಅದನ್ನೂ ಸ್ವಲ್ಪ ದುಬಾರಿ ಹಣ ತುಂಬಿ, ಅಂದರೆ ೫೫ ಸಾವಿರ ರೂಪಾಯಿ ತುಂಬಿ ಈ ಚಿತ್ರವನ್ನು ಒಂಟಿಯಾಗಿ ವೀಕ್ಷಿಸಿ(ಹೊರ ಬಂದರೆ)ದರೆ ೫ ಲಕ್ಷ ಬಹುಮಾನ...!!!. ಇದಕ್ಕೆ ಸಡ್ಡು ಹೊಡೆದವರಂತೆ ಬೆಂಗಳೂರಿನ ಒಬ್ಬ ಧೈರ್ಯವಂತ, ಪ್ರವೀಣ್ ಎಂಬ ಯುವಕ ಆಗಲೇ ೫೫ಸಾವಿರ ರೂಪಾಯಿಗಳನ್ನು ಪಾವತಿಸಿ ಏಕಾಂಗಿಯಾಗಿ ಈ ಚಿತ್ರವನ್ನು ನಗರದ ಐನಾಕ್ಸ್ ಚಿತ್ರಮಂದಿರದಲ್ಲಿ ಇವತ್ತು ವೀಕ್ಷಿಸಿದ್ದಾನೆ. ಆದರೆ ಅದರ ಫಲಿತಾಂಶ ಗೊತ್ತಾಗಿಲ್ಲ.

ದೆವ್ವದ ಕತೆ ಹೊಂದಿರುವ ಈ ಚಿತ್ರ ತುಂಬಾ ಭಯಾನಕವಾಗಿದೆ ಎಂದು ಸ್ವತಃ ಸುದೀಪ್‌ರವರೇ ಒಪ್ಪಿಕೊಂಡಿದ್ದಾರೆ. ಆದ್ದರಿಂದ ಮಕ್ಕಳನ್ನು ಈ ಚಿತ್ರ ನೋಡಲು ಕರೆದುಕೊಂಡು ಹೋಗುವುದು ಕಷ್ಟ. ಏನೇ ಆಗಲಿ ನಮ್ಮ ಸುದೀಪ್ ಈ ಬಾರಿ ಹಿಂದಿ ಚಿತ್ರರಂಗದಲ್ಲಿ ಒಂದು ಪ್ರಯತ್ನ ನಡೆಸಿದ್ದಾರೆ. ಅದು ಯಶಸ್ವಿಯಾಗಲಿ ಎಂದು ಎಲ್ಲರೂ ಹಾರೈಸೋಣ.